Sine Singkwenta is back!
Inanunsyo ng Film Development Council of the Philippines (FDCP) na magbabalik ang Sine Singkwenta sa “Pelikula ng Bayan” bilang bahagi ng pagdiriwang ng Philippine Film Industry Month (PFIM) ngayong Setyembre.
Ang “Sine Singkwenta: Pelikula ng Bayan” ay magpapalabas lamang ng mga pelikula sa halagang P50 bawat isa mula Setyembre 18 hanggang 24 sa mga piling sinehan sa Metro Manila, katulad ng SM Southmall sa Las Piñas; Robinsons Galleria sa Ortigas, Quezon City; at Ayala Malls Market Market sa Taguig.
Ang mga pelikulang ipapalabas ay binubuo ng mga kinikilalang tampok mula sa mga rehiyon, tulad ng “Huwebes Huwebes” nina Januar Yap, Don Gerardo Frasco, at Kristoffer Villarino; “Mga Tagapaglinis” ni Glenn Barit; “Iskalawags” ni Keith Deligero; “Little Azkals” ni Baby Ruth Villarama; at “Tu Pug Imatuy (The Right to Kill)” ni Arbi Barbarona.
Ang mga tiket sa screening ay makukuha on-site at online sa pamamagitan ng SM Cinema, Robinsons Movieworld, at Sureseats.
Ang “Sine Singkwenta: Pelikula ng Bayan” ay inorganisa ng FDCP sa pakikipagtulungan ng National Commission for Culture and the Arts, SM Cinema, Robinsons Movieworld, at Ayala Malls Cinema.
Kabilang sa iba pang mga kaganapan sa pagdiriwang ng PFIM ngayong Setyembre ang “Pelikula ng Bayan: Shorts Across Islands” screenings at “Films for Peace” screening, na kasalukuyang gaganapin hanggang Setyembre 27.
Tatakbo rin ang Sine Kabataan Short Film Festival 2024 mula Setyembre 20 hanggang 22.
— CDC, GMA Integrated News