CAGAYAN DE ORO CITY — Sumuko sa pulisya ang isang 32-anyos na lalaki matapos umanong saksakin ang kanyang 19-anyos na bayaw kasunod ng pagtatalo sa hindi nababayarang utang sa bayan ng San Fernando, Bukidnon noong Biyernes ng gabi.
Ayon sa ulat ng pulisya, nangyari ang insidente dakong alas-6:30 ng gabi sa Sitio Kauswagan, Barangay Little Baguio.
BASAHIN: Naaagnas na bangkay ng matandang mag-asawa na natagpuan sa bahay sa Bukidnon
Lumalabas sa inisyal na imbestigasyon ng San Fernando Municipal Police Station (MPS) na nagtungo ang biktima sa tirahan ng suspek para komprontahin ito tungkol sa pagtatalo noong nakaraang araw hinggil sa utang sa trabaho.
Sa komprontasyon, nilapitan umano ng suspek ang biktima mula sa likuran at sinaksak ito ng isang beses sa kaliwang baywang gamit ang jungle knife.
Agad namang tumakas ang suspek dala ang armas. Ang biktima ay dinala sa Bukidnon Provincial Hospital sa San Fernando para magamot.
Alas-11:50 ng gabi ng araw ding iyon, sumuko ang suspek sa San Fernando MPS at itinurn-over ang jungle knife na ginamit sa krimen.
Nananatili siya sa kustodiya ng pulisya habang nakabinbin ang pagsasampa ng naaangkop na mga reklamong kriminal sa Office of the Prosecutor. /jpv
