CAUAYAN CITY, Isabela — Tinatayang nasa P82.713 milyong halaga ng umano’y smuggled na sigarilyo ang nasabat ng pulisya at mga tauhan ng Bureau of Internal Revenue (BIR) sa tatlong negosyante, kabilang ang dalawang Chinese national, sa isinagawang operasyon sa isang hotel dito nitong Huwebes.
Kinilala lamang ni Isabela police director Col. Manuel Bringas ang mga suspek na sina “Willy” at dalawang Chinese national na kilala sa mga alyas na “Michael” at “Lisa.”
Dinala sila sa kustodiya para sa pagtatanong.
Sinabi ni Bringas na ikinasa ng mga awtoridad ang operasyon matapos makatanggap ng impormasyon na ang mga suspek ay sangkot umano sa pakyawan na pamamahagi ng mga smuggled na sigarilyo.
Gamit ang mission order na inilabas ng BIR, nagsagawa ng tax compliance, inspection, at enforcement activities ang mga pulis at BIR personnel sa Rooms 24 at 26 ng TD Hotel sa Barangay District 1.
Pinahintulutan ng mission order ang pag-inspeksyon at pagkumpiska ng mga smuggled na sigarilyo, hilaw na materyales, packaging materials, at kagamitan na ginagamit sa hindi awtorisadong paggawa ng mga produktong sigarilyo, gayundin ang pagpapatupad ng National Internal Revenue Code.
Narekober ng mga awtoridad ang 88 kahon ng Bon International Nise Red na sigarilyo at 20 kahon ng Modern 100s Green sa Room 24.
Isa pang 90 kahon ng Bon International Nise Red at apat na kahon ng Bon International Nise Blue ang nasabat sa Room 26. /gsg
