BACOLOD CITY – Magkahiwalay na natagpuang patay ang dalawang katao, kabilang ang isang negosyanteng nauna nang itinuro ng mga alagad ng batas bilang miyembro ng New People’s Army (NPA), dahil sa maraming tama ng bala sa Barangay 11 (Gawahon), Victorias City sa Negros Occidental noong Biyernes, Hulyo 10.
Kinilala ang mga nasawi na sina Jerome Seballos, 57, at Alex Cunanan, 59, ayon kay Col. Dennis Wenceslao, Negros Occidental police director.
BASAHIN: 5 ‘NPA rebels’ napatay sa bakbakan sa Negros
Inaalam pa ng mga imbestigador ang motibo ng mga pagpatay, ani Wenceslao.
Natagpuan ang bangkay ni Seballos sa Sitio 5, Barangay 11, alas-5:30 ng umaga, ayon sa opisyal ng pulisya.
Nabatid sa imbestigasyon ng pulisya na dakong 5:30 ng umaga nang makarinig ng maraming putok ng baril ang ilang residenteng nakatira malapit sa pinangyarihan ng insidente. Ilang sandali pa, nakita ng dalawang residente ang walang buhay na katawan ni Seballos na nakahandusay malapit sa isang motorsiklo na may mga tama ng bala sa ulo.
Natagpuan ang bangkay ni Cunanan mga dalawang kilometro ang layo mula sa unang pinangyarihan ng pamamaril sa parehong sitio, ani Wenceslao.
Lumabas sa imbestigasyon ng pulisya na bandang alas-6 ng umaga, pilit na dinala ang anak ni Cunanan ng pitong nakamaskara sa isang poultry farm kung saan matatagpuan ang kanyang ama.
Nang makita ni Cunanan ang mga lalaking nakamaskara, sinubukan niyang tumakas, ngunit pinaputukan siya ng mga ito. Dahil dito, nagtamo ng maraming tama ng bala sa iba’t ibang bahagi ng katawan ang biktima, sabi ng pulisya.
Si Seballos, isang negosyante, ay isa sa limang umano’y miyembro ng New People’s Army na naaresto sa warrant service operation sa kahabaan ng Circumferential Road sa Barangay Matab-ang, Talisay City, Negros Occidental, noong Abril.
Nasangkot umano ang grupo sa isang armadong engkwentro sa Army’s 79th Infantry Battalion sa Toboso, Negros Occidental, kung saan una silang nakatakas, sinabi ng PRO NIR sa nakaraang press statement.
Kalaunan ay nakalaya si Seballos mula sa kustodiya ng pulisya. /jpv
