MANILA, Philippines — Nasunog ang isang bahagi ng Doctor Jose Fabella Memorial Hospital sa Maynila, na naapula noong Huwebes ng hatinggabi, ayon sa Bureau of Fire Protection (BFP).
Sinabi ng BFP na nasunog ang ikalawang palapag ng tatlong palapag na tertiary healthcare facility sa lumang pangunahing gusali ng ospital dahil sa electrical ignition dulot ng maluwag na koneksyon.
Naiulat ang sunog alas-11:52 ng gabi noong Miyerkules at kaagad naapula alas-12:01 ng umaga noong Huwebes.
Sinabi ng Pamahalaang Lungsod ng Maynila na walang naiulat na pinsala o nasawi dahil sa sunog.
“As per report, no affected residential property, no injuries, and no casualty (naitala),” sinabi ng tagapagsalita ng lungsod sa mga mamamahayag noong Biyernes.
BASAHIN: Mahigit 15,000 kaso ng sunog ang naitala noong 2023, sabi ng BFP
