MANILA, Philippines — Arestado ang dalawang pasaherong Pinoy nitong Miyerkules sa Ninoy Aquino International Airport (Naia) Terminal 1 dahil sa pagdadala ng hinihinalang shabu na nagkakahalaga ng P56.6 milyon, ayon sa Bureau of Customs (BOC).
BASAHIN: BOC, nadiskubre ang P136.9M halaga ng misdeclared agricultural, illegal goods
Ayon sa BOC, humigit-kumulang 8,324 gramo ng shabu na nakatago sa loob ng dalawang bagahe ang nasabat ng mga awtoridad ng Customs mula sa dalawang babaeng pasahero na dumating mula sa Cambodia. Hindi naman ibinunyag ng ahensya ang pagkakakilanlan ng mga suspek.
“Ang mga ilegal na substance ay nakaimpake sa mga improvised na pouch na gawa sa carbon paper at packaging tape, at itinago pa sa tabi ng coffee powder, samu’t saring coffee packs, at mga personal na gamit sa mistulang pagtatangkang makaiwas sa pagtuklas. Ang mga nasabat na kontrabando ay may tinatayang halaga na P56,603,200,” sabi ng BOC sa isang pahayag.
BASAHIN: Ipinamahagi ng BOC ang mga abandonadong ‘balikbayan’ boxes sa mga OFW
Idinagdag ng BOC na ang dalawang indibidwal ay mahaharap sa posibleng mga kaso dahil sa paglabag sa Section 4, Article II ng Republic Act No. 9165 o Comprehensive Dangerous Drugs Act of 2002.
Ang mga nasabat na iligal na droga ay ibibigay din sa Philippine Drug Enforcement Agency para sumailalim sa confirmatory examination habang inihahanda ang inquest proceedings.
Sa pag-arestong ito, muling pinagtibay ni BOC commissioner Ariel Nepomuceno ang pangako ng ahensya na “iwasan ang pagpasok ng ilegal na droga at tiyakin ang kaligtasan at kagalingan ng mamamayang Pilipino.” /das
