Setyembre 30, 2024 | 12:00am
MANILA, Philippines — Kinumpirma ng Armed Forces of the Philippines (AFP) na binuntutan ng navy ng China ang ginanap na joint sea and air activities sa pagitan ng Pilipinas, Australia, Japan, at New Zealand sa bahagi ng West Philippine Sea (WPS).
Nabatid na isinagawa ng People Liberation Army Southern Theater Command ang naval at air forces routine reconnaissance sa paligid ng Bajo de Masinloc (Panatag, Scarborough Shoal) kasabay ng Multilateral Maritime Cooperative Activity (MMCA) ng Pilipinas, Australia, Japan, at New Zealand sa hilagang Luzon ng WPS.
Ayon kay AFP Spokesperson Col. Francel Margareth Padilla, namonitor ng AFP ang mga Chinese vessels malapit sa vicinity ng exercise subalit ang multilateral exercise ay nagpatuloy na walang nangyaring paghahadlang.
“Habang may mga obserbasyon sa mga sasakyang pandagat ng PLAN sa panahon ng MMCA, walang natanggap na mga ulat tungkol sa pagsasagawa ng diumano’y Chinese military exercise,” ani Padilla.
Pinadala ng AFP ang BRP Antonio Luna, BRP Emilio Jacinto, AW109 helicopter, at Philippine Air Force Search and Rescue (SAR) assets sa multilateral exercise habang Navy’s USS Howard sa US, HMAS Sydney sa Australia, JS Sazanami sa Japan at HMNZS Aotearoa sa New Zealand.
Dagdag ni Padilla, mahalaga ang demonstrasyon ng international cooperation para sa paglalalakas ng ugnayan at kakayahan ng magkakaalyadong bansa.
