Nahalal si ILIGAN Bishop Jose Rapadas bilang bagong chairman ng Catholic Bishops Conference of the Philippines (CBCP) – Episcopal Commission on Basic Ecclesial Communities (BEC).
Sa ulat ng CBCP News, sinabing si Rapadas ang nahalal na humalili sa yumaong Pagadian Bishop na si Ronald Lunas sa isinasagawang seminar ng mga obispo sa Pope Pius XII Catholic Center sa Maynila.
“Si Rapadas ang humalili kay Lunas bilang tagapangulo ng CBCP-BEC pagkatapos na pumanaw ang huli nitong unang bahagi ng buwan,” sabi ng CBCP News.
Hahawakan ni Rapadas ang posisyon hanggang Nobyembre 2025.
Si Rapadas, 51, ay kabilang sa mga pinakabatang obispo sa Philippine Church. Siya ay naglilingkod sa Diyosesis ng Iligan mula Setyembre 2019.
Noong 2021, inaprubahan ng CBCP ang pagtataas ng noo’y Committee ng BEC sa isang Episcopal Commission.
