MANILA, Philippines — Pinayuhan ng Land Transportation Office (LTO) ang mga motorista na mag-renew ng kanilang lisensya bago ang Hulyo 31, 2026 para maiwasan ang anumang parusa.
Ayon sa LTO, ang extension ng validity ng driver’s license, conductor’s license, student driver’s permit, at registration ng mga sasakyan ay magtatapos sa Hulyo 31, 2026 na nakasaad sa ilalim ng Memorandum Circular No. MVL-2026-5157.
BASAHIN: Binawi ng LTO ang lisensya ng vlogger matapos ang viral traffic violation
“Pagkatapos ng nasabing petsa, ang mga expired na lisensya, permit, at pagpaparehistro ng sasakyan na hindi pa nare-renew ay sasailalim sa umiiral na mga regulasyon at kaukulang mga parusa para sa late renewal,” sabi ng LTO sa isang advisory.
Pinayuhan din ng ahensya ang mga motorista na makipag-ugnayan sa kanilang pinakamalapit na LTO offices o bumisita sa opisyal na social media pages nito para sa verified information.
Nauna nang inihayag ng LTO na pinalawig ng tatlong buwan ang bisa ng mga lisensya at pagpaparehistro simula Abril 2026, na sumasaklaw sa mga lisensya sa pagmamaneho, lisensya ng konduktor, permit ng mag-aaral, at pagpaparehistro ng sasakyang de-motor. Sa panahong ito, ang LTO ay nag-waive ng mga parusa para sa late renewal ng mga dokumentong ito.
Binanggit ng LTO na ang direktiba na palawigin ang validity period ay alinsunod sa deklarasyon ni Pangulong Ferdinand Marcos Jr. ng national energy emergency sa gitna ng pagtaas ng presyo ng petrolyo dahil sa sigalot sa Middle East. /mr
