MANILA, Philippines — Naglabas ang Sandiganbayan nitong Lunes ng warrant of arrest laban kay Uswag Ilonggo party-list Rep. Jojo Ang at dating Sultan Kudarat Rep. Arnulfo Go gayundin sa dalawa niyang kapwa akusado.
Sinabi ng anti-graft court Third Division na nakakita sila ng probable cause para arestuhin sina Ang at Go, kasama ang kapwa akusado ng huli na sina Allan Gayosa Bayani at Mario Abasolo Labrador.
Ayon sa Sandiganbayan, kinasuhan ng state prosecutors si Ang dahil sa paglabag sa Section 3(h) ng Republic Act 3019 o ang Anti Graft and Corrupt Practices Act.
Para naman kay Go, kinasuhan siya ng state prosecutors, gayundin sina Bayani at Labrador noong Nobyembre 25 noong nakaraang taon dahil sa paglabag sa Article 217 ng Revised Penal Code (Malversation of Public Funds).
Naglabas din ng hold departure order ang Sandiganbayan laban sa lahat ng mga akusado. /gsg
