LUCENA CITY, Quezon – Arestado ng pulisya ang isang 42-anyos na lalaki na nahaharap sa reklamong panggagahasa at narekober ang hinihinalang shabu (crystal methamphetamine) at hindi lisensyadong baril sa isinagawang operasyon sa Bacoor City, Cavite, nitong Biyernes.
Ang suspek, na kinilala lamang sa alyas na “Randy,” ay inaresto ng mga operatiba ng pulisya sa Barangay Queensrow East noong Biyernes ng hapon, sinabi ng pulisya ng Calabarzon sa isang ulat noong Sabado.
Ayon sa pulisya, ang pag-aresto ay nag-ugat sa inihaing reklamo ng isang 16-anyos na dalagita, kasama ang kanyang ina, na umano’y ginahasa siya ng suspek sa loob ng kanyang bahay noong Hunyo 24.
Sinabi ng mga awtoridad na nanlaban umano ang suspek sa pag-aresto ngunit kalaunan ay nasukol ng mga arresting officer.
Nagtamo siya ng minor injuries sa insidente.
Nakuha umano sa suspek ang apat na heat-sealed plastic sachet na naglalaman ng hinihinalang shabu na tinatayang nagkakahalaga ng P13,600, gayundin ang isang hindi lisensyadong 12-gauge shotgun.
Nasa kustodiya na ngayon ng pulisya ang suspek at nahaharap sa mga kaso kaugnay ng reklamong panggagahasa, gayundin ng magkakahiwalay na reklamo dahil sa umano’y paglabag sa Comprehensive Dangerous Drugs Act of 2002 at batas sa illegal possession of firearms.
