COTABATO CITY — Nasamsam ng mga awtoridad ang P6.8 milyon halaga ng hinihinalang shabu at naaresto ang limang indibidwal, kabilang ang isang babae, sa isinagawang buy-bust operation noong Linggo ng hapon sa Barangay Basak Malutlut, Marawi City.
Sa isang pahayag, kinilala ni Police Maj. Mohammad Ridhwhan Ombawa, commander ng Regional Drug Enforcement Unit ng Police Regional Office-Bangsamoro Autonomous Region (RDEU-PRO BAR), ang mga suspek na sina Mawiya Gunting, alyas “Paks,” 56; Khadaffy Ampuan, 45; Ibrahim Mayasa, 52; Hassanor Gunting, 22; at Aisa Gunting, 48, pawang mga residente ng Lanao del Sur.
Isinagawa ang buy-bust operation alas-2:30 ng hapon noong Hunyo 14, sa pangunguna ng RDEU-PRO BAR na may suporta mula sa iba pang police units sa Marawi.
BASAHIN: P2.4M shabu nasabat sa Pangasinan drug sting operations
Sinabi ni Capt. Steffi Salanguit, tagapagsalita ng PRO-BAR, na nasabat ng mga operating unit ang isang malaking tea bag na naglalaman ng humigit-kumulang isang kilo ng hinihinalang shabu na may tinatayang street value na P6.8 milyon, batay sa valuation ng Dangerous Drugs Board.
Narekober din sa limang suspek ang 10 bundle ng marked money, isang kulay abong Toyota Avanza na may plate number NAU-1598, mga mobile phone, at mga dokumento.
Kasalukuyang nakakulong ang mga suspek sa Marawi City Police Station habang inihahanda ang mga kasong paglabag sa Republic Act 9165 o Comprehensive Dangerous Drugs Act of 2002 laban sa kanila. /mr
