CALAPAN CITY, Oriental Mindoro — Apat katao ang namatay habang 14 ang sugatan matapos bumangga ang isang pampasaherong jeepney sa puno at tumagilid sa kahabaan ng provincial road sa Barangay Fortuna, bayan ng Socorro noong Linggo, Mayo 10.
Patungo umano ang mga biktima sa sikat na Fortuna River para sa isang outing nang mangyari ang aksidente.
BASAHIN: Motorbike rider, patay sa pagkahulog ng poste ng kuryente sa Oriental Mindoro
Sinabi ni Provincial Disaster Risk Reduction and Management Officer Vincent Gahol na ang mga nasawi ay pawang mga residente ng bayan ng Gloria.
Batay sa spot report na isinumite ni Socorro police chief Major Joel Saguid sa Oriental Mindoro Police Provincial Office, may lulan ang jeepney na 18 pasahero, karamihan ay mga kamag-anak, nang maaksidente ito alas-11:45 ng umaga sa Sitio Taguicay, Barangay Fortuna.
Sinabi ng pulisya na nabigo ang preno ng sasakyan habang binabagtas ang isang kurbadong bahagi ng kalsada.
Upang maiwasang bumulusok sa bangin, idiniin umano ng driver ang jeepney sa puno. Tumagilid ang sasakyan matapos ang impact.
Nagtamo ng iba’t ibang pinsala ang 14 na sugatang pasahero at isinugod sa Grace Mission Hospital sa Barangay Catingan, Socorro.
Sinabi ng mga awtoridad na nananatili sa lugar ng aksidente ang jeepney habang nagpapatuloy ang imbestigasyon ng pulisya. /jpv
