LUCENA CITY, Quezon – Patay ang isang 69-anyos na biyuda matapos ang sunog na hindi pa rin matukoy ang pinanggalingan ang sumira sa kanyang bahay noong Huwebes, Mayo 14, sa bayan ng Tanay, lalawigan ng Rizal.
Sa huling ulat na inilabas nitong Biyernes, kinilala ng Police Regional Office 4A ang biktima na si “Liticia,” residente ng Sitio Bungahan sa Barangay Tandang Kutyo.
BASAHIN: Matandang lalaki, namatay sa sunog na sumira sa 2 bahay sa Rizal
Lumalabas sa inisyal na imbestigasyon na narinig ng isang kapitbahay ang malakas na pagsabog mula sa bahay ng biktima na gawa sa light materials, bandang alas-2 ng madaling araw, mabilis na kumalat ang apoy.
Ang mga bumbero mula sa lokal na kagawaran ng bumbero ay rumesponde at idineklara ang apoy na kontrolado makalipas ang isang oras.
Natagpuan ang bangkay ng biktima sa loob ng kanyang silid sa isinagawang clearing operations ng mga rumespondeng bombero.
Hindi naman tinukoy sa ulat ang kinaroroonan ng mga miyembro ng pamilya ng biktima nang sumiklab ang sunog.
Inaalam pa ng mga awtoridad ang eksaktong sanhi ng sunog. /jpv
