BALANGA CITY, Bataan — Arestado ng pulisya sa San Fernando, Pampanga ang suspek sa pagpatay sa isang dating kagawad ng barangay sa Hermosa, Bataan bago maghatinggabi noong Biyernes, Hunyo 26.
Kinilala ang suspek na si Alvin Vitangcol, 46, tubong San Ildefonso, Bulacan na naninirahan noon sa Hermosa.
Sinabi ng pulisya na hindi pa nila nakikilala ang iba pang mga suspek, na nananatiling nakalaya.
Narekober kay Vitangcol ang isang US carbine at ang puting Toyota Tamaraw na ginamit umano sa pagpatay kay dating Barangay Culis Councilor Norman Dalit, 42.
Si Dalit ay binaril sa labas ng kanyang tirahan sa Barangay Culis, Hermosa noong Biyernes ng umaga.
Nasa kustodiya na ngayon ng Hermosa Municipal Police Station si Vitangcol.
Sinabi ng pulisya na hindi pa matukoy ang motibo sa likod ng pagpatay habang nagpapatuloy ang imbestigasyon. /apl
