MANILA, Philippines — Hinimok ng Land Transportation Franchising and Regulatory Board (LTFRB) ang mga driver at operator ng public utility vehicle (PUV) na “samantalahin” ang tatlong buwang extension na ipinagkaloob ni Pangulong Ferdinand “Bongbong” Marcos Jr, para makabuo sila o sumali sa mga umiiral na kooperatiba o korporasyon.
Ito ang tugon ng Land Transportation Franchising and Regulatory Board nang hingan ng komento sa pagpapalawig ng deadline para sa konsolidasyon.
“Susunod ang LTFRB sa direktiba ni Pangulong ‘Bongbong’ Marcos na palawigin ang pagsasama-sama ng mga public utility vehicles (PUVs) hanggang Abril 30, 2024,” sabi nito sa mensaheng ipinadala sa mga mamamahayag.
“Hinihikayat ang mga operator at driver na samantalahin ang pagkakataong ito na ibinigay ng Pangulo,” dagdag nito.
Ang pagsasama-sama ng PUV drivers at operators sa isang kooperatiba o korporasyon ang unang hakbang sa PUV modernization program ng gobyerno.
Ang nakaraang deadline ay noong Disyembre 31, 2023.
