COTABATO CITY — Nasamsam noong Huwebes ng mga ahente ng anti-narcotics, suportado ng tropa ng pulisya at militar, ang humigit-kumulang P6.8 milyong halaga ng hinihinalang meth at inaresto ang dalawang umano’y nagbebenta ng droga sa isang entrapment operation sa bayan ng Bubong, Lanao del Sur.
Kinilala ni Director Gil Cesario Castro ng Philippine Drug Enforcement Agency-Bangsamoro Autonomous Region in Muslim Mindanao (PDEA-BARMM) ang mga naarestong suspek na sina Jamel Dimaporo, 29, at Jalil Macaayong, 19, kapwa ng Barangay Pindolonan sa bayan ng Bubong.
Agad namang inaresto sina Dimaporo at Macaayong matapos ibigay ang isang kilo ng meth sa isang undercover agent sa operasyon alas-5 ng hapon noong Miyerkules.
Suportado ng mga sundalo mula sa 103rd Infantry Brigade at mga tauhan ng Lanao del Sur police provincial office ang mga ahente ng PDEA.
Nitong Miyerkules din, isang drug den sa Barangay Rosary Heights 10 dito ang na-dismantle at apat na drug personalities ang naaresto sa isinagawang law enforcement operation dakong alas-10:45 ng gabi.
Nasamsam ng mga ahente ng PDEA, suportado ng Cotabato City Police Station 2 at PNP Maritime unit, ang 58 maliliit na sachet ng meth at inaresto sina Warren Datukaka, 34, Salma Abdullah Angkal, 34, Jobaine Guiabar Pantacan, 35, at Rabaibani Guiabar, 61. Guiabar , isang biyuda, ang kinilalang operator ng drug den.
Inihahanda na ang mga kaso laban sa mga naarestong suspek na nasa kustodiya na ngayon ng PDEA-BARMM at nakakulong sa pasilidad nito dito.
Umabot na sa P30 milyon ang hakot ng PDEA-BARMM ng mga nasabat na iligal na droga mula noong Enero 1.
