Nagluksa ang Catholic Bishops’ Conference of the Philippines (CBCP) noong Huwebes sa pagpanaw ng dalawang retiradong obispo na namatay na dalawang oras lang ang pagitan.
Si CBCP Bishop Emeritus Nereo Odchimar, 83, na dati ring presidente ng CBCP, ay namatay alas-10:27 ng umaga sa San Pedro Hospital sa Davao City, matapos ang mahabang pakikipaglaban sa diabetes at komplikasyon sa bato.
“Namatay siya sa metabolic encephalopathy dahil sa end-stage renal disease at diabetic nephropathy,” sabi ng diocese sa isang pahayag.
Naglingkod siya sa Diocese of Tandag nang humigit-kumulang 16 na taon hanggang sa kanyang pagreretiro noong 2018.
Samantala, binawian ng buhay si Bishop Honesto “Onie” Pacana, 91, alas-12:33 ng tanghali sa parehong araw sa Maria Reyna Xavier University Hospital sa Cagayan de Oro City, kung saan siya na-admit ng ilang araw.
Naglingkod siya sa Diyosesis ng Malaybalay nang halos 16 na taon hanggang sa kanyang pagreretiro noong Pebrero 2010.
Ayon sa diocese ng Tandag, “pinalawak ni Odchimar ang gawain ng ebanghelisasyon sa pamamagitan ng paglikha ng mga istasyon ng misyon, debosyonal na kapilya, quasi-parokya at mga parokya, at pagsasagawa ng mga pagbisitang pastoral hanggang sa malalayong lugar ng diyosesis.”
Repormador ng simbahan
Bilang obispo, sinimulan niyang ipatupad ang financial management system ng diyosesis at pinasimulan din ang pagtatayo ng bagong San Nicolas de Tolentino Cathedral.
Si Odchimar ay ang ika-18 CBCP president, nagsilbi mula 2009 hanggang 2011. Siya rin ang tagapangulo ng Episcopal Commission on Canon Law nito.
Samantala, si Pacana ay nagsilbi bilang unang tagapangulo ng Episcopal Commission on Culture ng CBCP, na itinatag noong 1994.
Sina Odchimar at Pacana ang ikatlo at ikaapat na obispong Pilipino na namatay ngayong taon. Si Bishop Ronald Lunas ng Pagadian ay namatay noong Enero 2, at si Archbishop Emeritus Fernando Capalla ng Davao ay namatay noong Enero 6.