LUCENA CITY, QUEZON, Philippines — Patay ang isang 70-anyos na babae matapos masagasaan ng pampasaherong jeepney nitong Miyerkules, Hunyo 17, sa Pililla, Rizal.
Sa ulat mula sa Police Regional Office 4A, ang biktima, na kinilala lamang sa pangalang “Nene,” ay nagtangkang tumawid sa isang kalsada sa Barangay Niogan noong Miyerkules ng umaga nang mabundol siya ng dumaan na jeepney na minamaneho ng isang 22-anyos na lalaki na kinilalang si “Justine.”
Nagtamo ng fatal injuries ang biktima at isinugod sa ospital, ngunit idineklara itong dead on arrival.
BASAHIN: 1 patay, 6 sugatan sa Baguio City highway mishap
Sa imbestigasyon, sinabi ng driver sa pulisya na pansamantala siyang nabulag ng maliwanag na ilaw mula sa kabilang direksyon.
BASAHIN: 5 patay, 12 sugatan nang bumulusok ang trak sa bangin ng Pangasinan
Aniya, lumihis siya sa kaliwang bahagi ng kalsada para makaiwas sa banggaan ng isa pang sasakyan, ngunit aksidenteng nabangga ang biktima.
Nasa kustodiya ng pulisya ang driver habang patuloy ang imbestigasyon ng mga awtoridad.
