Ang Balikatan ngayong taon o ang taunang joint military exercise sa pagitan ng Pilipinas at Estados Unidos ay opisyal na isinara noong Biyernes.
Sa closing ceremony sa Camp Aguinaldo, idineklara ni Armed Forces of the Philippines (AFP) chief General Romeo Brawner Jr. ang pagtatapos ng 39th iteration ng exercise, na nagsimula noong Abril 22.
Nagpadala ang AFP ng 5,000 tauhan, pangunahin mula sa Northern Luzon Command (NOLCOM) at Western Command (WESCOM), para sumama sa mga aktibidad ng Balikatan.
Mula sa US, humigit-kumulang 11,000 tauhan ang sumali, kabilang ang 3,700 US Marines, 1,200 sundalo, 4,000 US Navy personnel, 400 airmen at Air National Guardsmen, pati na rin ang 750 US Special Operations forces.
Gayundin, ang Australian Defense Force ay nagtalaga ng humigit-kumulang 150 tauhan.
Kabilang sa mga highlight ng ehersisyo ay ang kauna-unahang multilateral maritime exercise (MME) nito sa West Philippine Sea na kinasasangkutan ng mga tropa mula sa Pilipinas, United States, at France.
Ang mga kalahok na barkong pandigma ay ang BRP Ramon Alcaraz ng Philippine Navy, isang offshore patrol vessel at BRP Davao del Sur, isang landing platform dock; ang Marine Nationale (French Navy) frigate FS Vendémiaire; at US Navy amphibious warfare ship na USS Harpers Ferry, ayon kay Coloma.
Nagsagawa rin ang mga kalahok ng Balikatan ng maritime strike exercise na nagta-target sa isang kunwaring barko ng kaaway.
Inatake ng Fast Attack Interdiction Crafts ng Philippine Navy, BRP Jose Rizal (FF150), gayundin ng iba pang naval at aerial assets ang target na barko na BRP Lake Caliraya, isang decommissioned vessel.
Isinagawa rin ang live fire exercise sa sand dunes at coastline ng Ilocos Norte.
Nakiisa rin ang iba pang ahensya sa pagsasanay tulad ng Philippine Coast Guard, Philippine National Police, Department of Information, Communications, and Technology, Office of Civil Defense, at Presidential Communications Office. — RSJ, GMA Integrated News