Binatikos ng Philippine Navy nitong Martes ang People’s Liberation Army (PLA) ng China dahil sa pagsasagawa kamakailan ng mga ehersisyo sa Sabina Shoal sa West Philippine Sea.
“Noong isang araw, nagsagawa ng ehersisyo ang PLA sa Sabina Shoal mula 1100 hanggang 1800. Naulit din ito kahapon. We were able to monitor and challenge all their actions in Sabina Shoal,” sabi ni Philippine Navy spokesperson Commodore Roy Vincent Trinidad sa isang press briefing.
Ayon kay Trinidad, naglunsad ng hovercraft at aircraft ang militar ng China at nagsagawa ng mga maniobra sa dagat.
“Unang-una, wala silang karapatan na mapaloob sa ating exclusive economic zone. Ang pagsasagawa ng ehersisyo ay hindi awtorisado sa ilalim ng UNCLOS. Bawal po,” he added.
Samantala, ang bilang ng mga Chinese vessel sa WPS features ay tumaas sa 125 mula sa 112 noong nakaraang linggo, ayon kay Trinidad.
Nag-deploy kamakailan ng barko ang Philippine Coast Guard (PCG) sa Sabina Shoal dahil inakusahan nito ang China na gumawa ng artificial island sa lugar.
Ang Sabina Shoal ay nagsisilbing tagpuan ng mga sasakyang pandagat na nagsasagawa ng resupply mission sa mga tropang Pilipino na nakatalaga sa BRP Sierra Madre na naka-ground sa Ayungin Shoal.
Inaangkin ng China ang halos buong South China Sea, isang conduit para sa higit sa $3 trilyon sa taunang ship commerce. Ang mga pag-aangkin sa teritoryo nito ay magkakapatong sa mga pag-aangkin ng Pilipinas, Vietnam, Malaysia, at Brunei.
Tinatawag ng Maynila ang mga bahagi ng tubig sa loob ng eksklusibong sonang pang-ekonomiya nito bilang West Philippine Sea.
Noong 2016, pinasiyahan ng internasyonal na arbitration tribunal sa Hague na ang mga pag-angkin ng China sa South China Sea ay walang legal na batayan, isang desisyon na hindi kinikilala ng Beijing. —VAL, GMA Integrated News
