DAVAO CITY – Tinamaan ng baha ang ilang barangay sa lungsod na ito nitong Biyernes sa gitna ng malakas na pag-ulan bunsod ng Severe Tropical Storm Kiyapo at southwest monsoon.
Sa video na ipinost ni MJ Bacalso sa Facebook pasado alas-9 ng gabi, binaha ang Bangkal sa Barangay 19-B.
Ilang residente ang napilitang sumilong sa itaas na bahagi ng kanilang mga bahay habang ang iba naman ay humiling na iligtas sila ng mga awtoridad.
Alas 9:40 ng gabi noong Biyernes, naglabas ang City Disaster Risk Reduction and Management Office ng preemptive evacuation order para sa lahat ng residente sa tabi ng Ilog Matina.
Pinakilos nito ang lahat ng barangay DRRMO at volunteer groups sa mga komunidad malapit sa ilog para tumulong sa pagpapatupad ng evacuation order.
Naiulat din ang pagbaha sa ilang bahagi ng Tabuk District.
