Ito ang buod na binuo ng AI, na maaaring may mga error. Para sa konteksto, palaging sumangguni sa buong artikulo.
Karamihan ng dengue cases ay walang sintomas o, kung mayroon man, ay mild lamang, ngunit nagkakaroon din ng severe cases na maaaring mauwi sa pagkamatay
MANILA, Philippines – Ang dengue ay isang viral infection na nakukuha ng tao mula sa kagat ng lamok.
Ayon sa World Health Organization (WHO), karamihan ng dengue cases ay walang sintomas o, kung mayroon man, ay mild lamang. Sa ganitong mga kaso, gagaling ang pasyente sa loob ng isa o dalawang linggo.
Kung mayroong sintomas, magsisimula ito apat hanggang 10 araw matapos makagat ng lamok, at magtatagal naman nang dalawa hanggang pitong araw.
Sabi ng WHO, ito ang mga karaniwang sintomas ng dengue:
- Mataas na lagnat (40°C)
- Matinding sakit ng ulo
- Masakit na likod ng mga mata
- Masakit na kalamnan at kasukasuan
- Pagduduwal
- Pagsusuka
- Namamagang kulani
- Rashes o namumula-mulang balat
Minsan, nagkakaroon din ng malalang kaso (severe cases) na maaaring mauwi sa pagkamatay.
Kadalasang nararanasan ang matitinding sintomas ng dengue matapos mawala ang lagnat, ayon sa WHO. Kabilang sa severe symptoms ang mga sumusunod:
- Matinding sakit ng tiyan
- Madalas na pagsusuka
- Mabilis na paghinga
- Dumudugong gilagid o ilong
- Pagkapagod
- Pagkabalisa
- Dugo sa suka o dumi ng tao
- Matinding pagkauhaw
- Namumutla at malamig na balat
- Panghihina
Gamot sa dengue
Ayon sa WHO, wala pang partikular na paraan ng paggamot sa dengue. Management of symptoms lamang ang ginagawa upang mabawasan ang sakit na nararamdaman ng pasyente.
Para sa mild cases na puwedeng gamutin sa bahay, karaniwang ginagamit ang acetaminophen o paracetamol. Pinapayuhan ng WHO ang publiko na iwasan ang ibuprofen at aspirin kapag may dengue sapagkat maaaring pataasin ng mga ito ang tsansa ng pagdurugo.
Mahalaga rin ang pagpapahinga at pag-inom ng maraming tubig.
Kung nakararanas naman ang pasyente ng severe na mga sintomas, dalhin agad ito sa ospital. – Acor Arceo/Rappler.com
