TUGUEGARAO CITY- Isang aso na nagngangalang “Peaches” ang tumulong sa pagtuklas ng substance na pinaniniwalaang shabu (methamphetamine hydrochloride) sa isang drug operation noong Hulyo 19 sa Basco port sa Barangay Kaychanarianan sa Batanes.
Ito ang sinabi ng Coast Guard District North Eastern Luzon (CGDNELZN) sa isang pahayag noong Hulyo 20.
Inaresto ng Coast Guard na nakatalaga sa Batanes at ng K9 team nito ang consignee, na hindi pa ipinalabas sa publiko ang pangalan.
BASAHIN: 9 retired drug detection dogs, ipapa-adopt – PDEA
Kasama ang Philippine Drug Enforcement Agency (PDEA) at Batanes police intelligence officers, ininspeksyon ng Coast Guard ang mga cargo items matapos makatanggap ng tip tungkol sa umano’y consignment ng droga.
Ang Coast Guard Narcotics Detection Dog (NDD) na pinangalanang “Peaches” ay nagpakita ng positibong indikasyon ng pagkakaroon ng potensyal na kontrabando sa loob ng isang nakabalot na kahon.
Binuksan ng mga alagad ng batas ang kahon at nadiskubre ang dalawang heat-sealed plastic sachet ng umano’y shabu na tumitimbang ng 7 gramo at nagkakahalaga ng P47,600. l
Nasaksihan ng mga lokal na opisyal, isang kinatawan ng Department of Justice, at isang media practitioner ang imbentaryo at dokumentasyon ng pulisya at mga ahente ng anti-narcotics.
Inaresto ang consignee at kakasuhan kasama ng nagpadala ng box./coa
