MANILA, Philippines — Arestado ng pulisya ang isang empleyado ng Quezon City Hall dahil sa robbery extortion sa isinagawang entrapment operation nitong Sabado.
TKinilala ng National Capital Region Police Office (NCRPO) ang 56-anyos na suspek na si Joel Aquino Avila, na nahuli ng mga operatiba ng Criminal Investigation and Detection Unit sa isang restaurant sa kahabaan ng Visayas Avenue, Barangay Vasra.
Sa records, si Avila ay empleyado ng engineering office ng QC Hall.
Isang hindi pinangalanang complainant ang nagsabi sa pulisya na hiniling sa kanya ng suspek na magdeposito ng dalawang tseke na nagkakahalaga ng P1 milyon at P500,000, na gagamitin sana sa pagproseso ng kanyang building permit, business permit, zoning, at certificate of exemption para sa bodega ng kanyang negosyo ng pagkain ng alagang hayop noong 2022.
Sa parehong taon, humingi umano si Avila ng isa pang P1.1 milyon para sa certificate of exemption. Gayunman, sinabi ng complainant na wala siyang natanggap na anumang dokumento mula sa suspek.
Makalipas ang dalawang taon, noong Marso 15, sinabi ng complainant na muling humingi sa kanya si Avila ng P700,000. Inaresto siya ng mga awtoridad sa kanilang transaksyon.
Si Avila ay kasalukuyang nasa kustodiya ng CIDU-QCPD.
