Sinabi ng Armed Forces of the Philippines (AFP) nitong Sabado na nagsagawa ng delikadong maniobra ang China Coast Guard laban sa isang barko ng Pilipinas sa isang rotation and resupply (RoRe) mission sa Ayungin Shoal.
Inilabas ng AFP ang mga larawan at video ng insidente na naganap bandang alas-6 ng umaga
Makalipas ang isang oras, iniulat ng Philippine Coast Guard (PCG) na ang isa sa mga sasakyang pandagat nito, na bahagi ng misyon, ay napaliligiran ng mga sasakyang pandagat ng China.
“Ang Philippine Coast Guard (PCG) vessel, MRRV 4409, ay naharang at napalibutan ng isang (1) China Coast Guard vessel na may bow number 21551, kasama ang dalawang (2) China Maritime Militia Vessels (CMMV) na may bow number 00036 at 00314,” ani PCG spokesman for West Philippine Sea (WPS) Commodore Jay Tarriela.
“Nahiwalay ang MRRV 4409 sa resupply boat dahil sa iresponsable at mapanuksong pag-uugali ng Chinese maritime forces, na nagpakita ng pagwawalang-bahala sa Convention on the International Regulations for Preventing Collisions at Sea (COLREGS),” he emphasized.
WATCH: Barko ng @coastguardph na escort ng resupply boat ng bansa na patungo sa Ayungin Shoal, hinarang at pinalibutan ng mga barko ng China Coast Guard at Chinese maritime militia ngayong Linggo ng umaga. | via @xtian_mano
(????: @coastguardph) pic.twitter.com/5knEpFf7LU
— DZBB Super Radyo (@dzbb) Marso 23, 2024
Bitbit ang mga suplay para sa mga sundalong Pilipino na nakatalaga sa BRP Sierra Madre SA Ayungin Shoal ay ang Unaizah Mayo 4 (UM4).
Ang UM4 ay ang parehong sasakyang-dagat na nasira sa isang water canon attack ng China Coast Guard noong nakaraang buwan.
Sinabi ng AFP na umalis ang UM4 sa Naval Detachment Oyster Bay sa Puerto Princesa City, Palawan noong Biyernes, Marso 22, 2024.
Ito ay sina-escort ng dalawang barko ng Philippine Navy, na may dalawa pa mula sa Philippine Coast Guard bilang mga escort sa UM4, ayon sa AFP.
“Ang partikular na misyon na ito ay itinakda upang matiyak ang isang buong tropa na makadagdag sa BRP Sierra Madre matapos na lumikas kamakailan ang isang tauhan na nangangailangan ng seryosong atensyong medikal,” sabi ng AFP.
“Ang mga tauhan ay ini-rotate upang matiyak na ang mission posture ng BRP Sierra Madre ay nananatiling walang kompromiso,” dagdag nito. —VAL, GMA Integrated News
