TUGUEGARAO CITY – Hindi bababa sa 43 katao ang nasugatan nang mahulog ang isang overloaded na pampasaherong jeep sa apat na metrong bangin sa bayan ng Enrile, lalawigan ng Cagayan noong Linggo (Abril 28), ayon sa mga awtoridad.
Sa inisyal na ulat mula sa local disaster risk reduction and management office, sinabing nag-malfunction ang manibela ng sasakyan at hindi agad napigilan ng driver habang binabagtas ang tabing kalsada sa Barangay San Roque.
Nagtamo ng mga sugat at bali ang mga sugatang pasahero at dinala sa Cagayan Valley Medical Center (CVMC) para magamot.
Nangako ang local government unit na tutulungan ang mga biktima. INQ