MANILA, Philippines – Apat na construction worker ang namatay habang dalawa pang indibidwal ang nasugatan kasunod ng landslide sa Antipolo City nitong Miyerkules, ayon sa Bureau of Fire Protection (BFP).
Iniulat ng BFP na nangyari ang insidente habang nililinis ng mga biktima ang retaining wall na kanilang binuwag sa Fairmount Hills Subdivision, Barangay Dela Paz.
“Ang koponan ay walang sawang nagtulungan at nagawang iligtas ang 2 katao na buhay at nakuha ang 4 na kaswalti na nakulong sa ilalim ng lupa at putik,” sabi ng BFP sa isang pahayag noong Miyerkules ng gabi.
Kinumpirma ng Antipolo City Police Station nitong Huwebes na lahat ng nasawi—may edad 32, 33, 37 at 56—ay mga construction worker.
Samantala, nagtamo naman ng mga pinsala ang isang 20-anyos na construction worker at isa pang residente, ayon sa pulisya.
“Ibinunyag ng imbestigasyon na nililinis ng mga biktima ang mga pundasyon ng retaining wall na hinukay,” sabi ng pulisya sa ulat nito noong Huwebes.
“Biglang gumuho ang natural na lupa at bumagsak sa mga biktima,” dagdag nito.
Inabot ng dalawang oras ang search and retrieval operations, ayon sa mga awtoridad.
