LUCENA CITY — Patay ang dalawang sakay ng motorsiklo noong Martes, Hulyo 16, matapos mabangga ang kanilang sasakyan sa nakaparadang traktor sa bayan ng Candelaria sa lalawigan ng Quezon, sabi ng pulisya.
Binabaybay ng motorsiklong sinasakyan ng hindi pa nakikilalang driver at backrider factory worker na si Emerson Alviso, 21, ang Maharlika Highway dakong alas-2:15 ng madaling araw nang mabangga ang kanilang sasakyan sa nakaparadang tractor head sa gilid ng kalsada sa Barangay Masin Norte, isang spot report mula sa Quezon police.
Parehong nagtamo ng fatal injuries ang dalawang rider at namatay on the spot.
Hindi tinukoy ng pulisya kung ang nakaparadang tractor head na minamaneho ni “Don” ay may reflectorized o early warning device para maalarma ang mga paparating na sasakyan.
Inilagay si Don sa kustodiya ng pulisya habang patuloy ang imbestigasyon.
