Inaasahang magtataas ng hindi bababa sa P2 kada litro ang presyo ng petrolyo ng mga kumpanya ng langis dahil sa lumalalang kaguluhan sa Middle East. Sa pagtataya ni Rodela Romero, direktor ng Department of Energy (DOE) Oil Industry Management Bureau, maaaring tumaas ang kada litro ng presyo ng gasolina ng P2 hanggang P2.30 at ang diesel ng P2.35 hanggang P2.65. Ang mga presyo ng kerosene ay inaasahang magkakaroon ng pinakamalaking upward adjustment mula P2.45 hanggang P2.55 kada litro. Inaasahan din ng Jetti Petroleum ang mas mataas na paggalaw ng presyo para sa susunod na linggo. Sinabi nito na ang presyo ng diesel at gasolina ay maaaring tumaas ng P2.50 hanggang P2.70 at P2.30 hanggang P2.50, ayon sa pagkakasunod. Ang mga kumpanya ng langis ay karaniwang nag-aanunsyo ng kanilang mga opisyal na presyo tuwing Lunes, kasama ang mga pagsasaayos na ipinatupad sa susunod na araw. Noong nakaraang linggo, itinaas din ng mga retailer ng gasolina ang presyo ng diesel at kerosene ng P1.20 at 70 centavos kada litro, ayon sa pagkakasunod. —LISBET K. ESMAEL
