MANILA, Philippines — Inanunsyo nitong Miyerkules ng Quezon City Police District (QCPD) ang pagkakasamsam ng mahigit P2 milyong halaga ng iligal na droga.
Isinagawa ng QCPD Batasan Police Station 6 ang buy-bust operation nitong Martes sa Commonwealth Avenue sa Barangay Batasan Hills, Quezon City.
BASAHIN: 6 arestado, P15.8 milyon halaga ng droga nasabat sa 2 QC buy-busts
Isang pulis ang nagpanggap na buyer at bumili ng P48,000 halaga ng droga mula sa suspek na kinilalang si Lemuel Lucero, 29-anyos, ayon sa QCPD. Inaresto si Lucero matapos ang transaksyon.
Nakuha sa kanya ang 300 gramo ng “shabu” na nagkakahalaga ng P2.04 milyon at 140 gramo ng high-grade marijuana na “kush” na pinaniniwalaang nagkakahalaga ng P214,000. Kakasuhan si Lucero ng paglabag sa Comprehensive Dangerous Drugs Act of 2002. —Frances Mangosing
