PORMAL na nangako ang Pilipinas sa Labor Inspection Convention, 1947 (No. 81) ng International Labor Organization (ILO) noong Martes (Geneva time) sa Geneva, Switzerland.
Sa isang pahayag, sinabi ng Department of Labor and Employment (DOLE) na pormal na isinumite ni Labor Undersecretary Benedicto Ernesto Bitonio ang ratified Convention 81 kay ILO Director General Gilbert Houngbo.
“Sa pagpapatibay ng Convention 81, muling pinagtitibay ng gobyerno ng Pilipinas ang pangako nitong palakasin ang sistema ng labor inspection nito upang matiyak ang patas, disente, ligtas, at secure na kondisyon sa pagtatrabaho para sa lahat ng manggagawa,” ani Bitonio.
“Ang ILO convention na niratipikahan ng Pilipinas ay binibigyang-diin ang pangako ng Pilipinas sa patas at ligtas na kondisyon sa pagtatrabaho para sa lahat ng manggagawang Pilipino,” dagdag niya.
Sa pormal na paglalahad ng pangako ng Pilipinas, sinabi ni Bitonio na handa ang DOLE na magpatupad ng epektibong sistema ng inspeksyon sa paggawa sa lahat ng industriya upang subaybayan, ipatupad, at pangalagaan ang mga karapatan ng mga manggagawa.
“Ang Gobyerno ng Pilipinas ay tututukan sa pagpapabuti ng mga serbisyo sa labor inspection, pagpapahusay sa kapasidad ng mga labor inspector, at pagpapalakas ng pakikipagtulungan sa mga stakeholder upang isulong ang pagsunod sa mga batas sa paggawa,” sabi ni Bitonio.
Ang ILO Convention No. 81 ay nagtatatag ng mga pandaigdigang pamantayan para sa isang komprehensibong balangkas ng inspeksyon sa paggawa upang epektibong ipatupad ang mga pambansang batas sa mga kondisyon sa pagtatrabaho at protektahan ang mga karapatan ng mga manggagawa.
Ang Pilipinas ang ika-151 na estadong miyembro ng ILO na nagpatibay sa Convention No. 81.
Sa hiwalay na pahayag, tinanggap ni Houngbo ang pagdaragdag ng Pilipinas sa mga bansang nagpatibay ng ILO Convention No. 81.
“Sa pagpapatibay ngayon, muling pinagtitibay ng Pilipinas ang pangako nito sa pagpapatupad ng mga legal na probisyon na nagtataguyod sa mga kondisyon ng trabaho at proteksyon ng mga manggagawa,” sabi ni Houngbo.
“Ang Convention na ito ay gumaganap ng isang mahalagang papel sa pagtiyak ng disenteng trabaho sa pamamagitan ng mahigpit na pagpapatupad ng mga pambansang batas na may kaugnayan sa mga kondisyon sa paggawa,” dagdag niya.
Binanggit ni Houngbo na niratipikahan na ngayon ng Pilipinas ang 41 ILO convention.
