ISASAGAWA ngayong araw ng Department of Justice, Martes, ang preliminary investigation sa palsipikasyon ng isang notary public case na inihain laban sa dinismiss na mayor ng Bamban, Tarlac na si Alice Guo.
Bukod sa falsification, kasama rin sa kaso ang perjury at obstruction of justice. Ang pagdinig ay nakatakda sa 1 pm
Si Senior Assistant State Prosecutor Wendell Bendoval ang namumuno sa panel ng prosekusyon, kasama sina prosecutors Ryan Leocario at Michael Elvin Tan bilang mga miyembro.
Ang kaso laban kay Guo, abogadong si Elmer Galicia na nagnotaryo ng kanyang counter-affidavit, at tatlong iba pa ay isinampa ng National Bureau of Investigation noong nakaraang buwan.
Ito ay matapos sabihin ng NBI na lumabas sa kanilang pagsusuri na hindi pumirma si Guo sa kanyang counter-affidavit, taliwas sa kanyang testimonya sa Senado noong Setyembre 17.
Ang counter-affidavit ay inihain bilang tugon sa trafficking in person complaint na inihain laban kay Guo na nagmula sa umano’y pagkakasangkot nito sa operasyon ng Philippine Offshore Gaming Operator (POGO) hub sa Bamban na ni-raid ng mga awtoridad dahil sa umano’y ilegal na aktibidad.
Ang counter-affidavit, na notarized noong Agosto 14 sa San Jose Del Monte, Bulacan, ay inihain ilang araw matapos isumite ang reklamo para sa resolusyon noong Agosto 6.
Inamin ni Galicia na hindi personal na nanumpa si Guo sa harap niya.
Nagsampa na rin ng reklamo ang NBI sa Korte Suprema para i-disbar si Galicia.
