LEGAZPI CITY — Pinagbabaril at napatay noong Miyerkules ng hindi pa nakikilalang mga suspek ang isang 65-anyos na lalaki at ang kanyang anak sa bayan ng Lupi sa Camarines Sur.
Sa ulat nitong Huwebes, Nobyembre 7, sinabi ng Lupi police habang nanonood ng telebisyon sa loob ng kanilang canteen, nilapitan si Desederio Longabela ng dalawang armadong lalaki at pinagbabaril ng ilang beses sa Barangay Colacling alas-6:10 ng gabi.
Matapos marinig ang putok ng baril, lumabas ang kanyang anak na si Bobby, 38, upang tingnan ang kanyang ama, at binaril din ng maraming beses ng mga suspek.
Parehong nagtamo ng tama ng bala sa iba’t ibang bahagi ng katawan ang mga biktima. Namatay sila kaagad.
Sinabi sa inisyal na ulat na si Bobby ay dating miyembro ng Civilian Armed Force Geographical Unit.
Ang artikulo ay nagpapatuloy pagkatapos ng patalastas na ito
Nagsasagawa pa ng imbestigasyon ang pulisya para sa posibleng pagkakakilanlan at pagdakip sa mga suspek.
