Ipinagbawal ng Cebu City local government unit ang fireworks displays sa mga residential areas para matiyak ang kaligtasan ng publiko sa gitna ng Yuletide season.
Nilagdaan ni Cebu Mayor Alvin Garcia, nakasaad ang Executive Order No. 26 na ang mga fireworks display ay bawal din sa mga pribadong kabahayan at ospital.
Ang mga fireworks display ay isasagawa lamang ng mga awtorisadong tao na nakakuha ng espesyal na permit.
Ang mga opisyal ng barangay, sa pakikipagtulungan ng Philippine National Police (PNP) at Bureau of Fire Protection, ay inatasang magtalaga ng mga fireworks zone sa mga community areas sa ilalim ng mga sumusunod na pamantayan:
- Populasyon sa loob ng lugar
- Availability ng emergency medical staff o first aid responders at mga kinakailangang kagamitan
- Pagkakaroon ng mga kagamitan sa paglaban sa sunog
- Ligtas na distansya na higit sa 100 talampakan ang layo mula sa mga lugar ng tirahan
- Ang iba pang mga kadahilanan na maaaring may kaugnayan sa kaligtasan ng mga residente sa lugar
Nauna nang hinimok ng PNP ang publiko na huwag magsindi ng paputok sa mga residential areas sa pagsalubong sa Bagong Taon upang matiyak ang kaligtasan ng lahat.
Sinabi ng PNP-Civil Security Group na mayroong 28 na ipinagbabawal na paputok, kabilang ang Watusi, Piccolo, Five Star (Bog) at Pla-Pla.
Sa pinakahuling ulat nito, nakapagtala ang Department of Health ng 25 firecracker-related injuries isang araw bago ang Araw ng Pasko.
—Mariel Celine Serquiña/RF, GMA Integrated News
