Naglabas ng executive order (EO) si Pangulong Ferdinand “Bongbong” Marcos Jr. na naglilipat ng administrative supervision ng Film Academy of the Philippines (FAP) mula sa Department of Education (DepEd) patungo sa Department of Trade and Industry (DTI).
Ipinag-utos ni Marcos ang paglipat sa bisa ng EO 70, na naglalayong palakasin ang FAP at higit na paunlarin ang industriya ng pelikula sa bansa. Ang EO ay nilagdaan ni Executive Secretary Lucas Bersamin sa pamamagitan ng awtoridad ng Pangulo.
Ang FAP, na nilikha sa ilalim ng EO 640-A (serye ng 1981 na sinusugan ng EO 513 noong 2006, ay nasa ilalim ng pangangasiwa ng DepEd.
Sa pagbanggit sa Philippine Creative Industries Act, sinabi ng Pangulo na responsibilidad ng Estado na itaguyod at suportahan ang pag-unlad ng mga malikhaing industriya ng bansa tulad ng industriya ng pelikula “sa pamamagitan ng pagprotekta at pagpapalakas sa mga karapatan at kapasidad ng, bukod sa iba pa, mga malikhaing pelikula, mga artista, tagalikha, manggagawa, at stakeholder sa mga malikhaing industriya.”
Ang DTI ay ang nangungunang ahensyang nagpapatupad ng Philippines Creative Industries Act.
“(T)o maximize the full potential of the Philippines Film Industry, it is imperative to ensure that world-class Filipino talents in the field of motion picture arts and sciences are given due recognition and assistance by the National Government,” ani Marcos.
Ang EO 70, na inilabas noong Okt. 2, 2024, ay magkakabisa kaagad pagkatapos mailathala sa Opisyal na Gazette o isang pahayagan na may pangkalahatang sirkulasyon. — VDV, GMA Integrated News
