Ito ay nabuo ng AI na nagbubuod, na maaaring magkaroon ng mga pagkakamali. Para sa konteksto, palaging sumangguni sa buong artikulo.
Magsasampa ng reklamong direct assault ang di-pinangalanang babaeng pulis mula sa Special Action Force
Naospital ang babaeng pulis mula sa Special Action Force (SAF) matapos hambalusin ng cellphone ni dating first lady Honeylet Avanceña, ang partner ni ex-president Rodrigo Duterte, nitong Martes, Marso 11, sa Villamor Air Base sa Pasay City.
Inilabas ng Philippine National Police (PNP) nitong Huwebes ang video kung paano inupakan ni Avanceña ang di-pinangalanang police officer sa kainitan ng pagpapasakay kay Duterte sa eroplano papuntang The Hague.
Dinakip ng mga alagad ng batas ng Pilipinas si Duterte umaga ng Martes pagkalapag ng kanyang eroplano sa NAIA mula sa Hong Kong. Hawak nila ang warrant of arrest na ipinadaan ng International Criminal Court sa Interpol. Haharapin ni Duterte ang kasong crimes against humanity — malawakang pang-aabuso sa mga sibilyan noong siya ay mayor ng Davao hanggang taong 2019 noong siya ay pangulo.
Dinala si Duterte at kanyang mga kasamahan sa Villamor Air Base para hintayin naman ang chartered flight papuntang Dubai at malaon ay sa Netherlands.
Sa isang video, makikitang napaliligiran ng mga SAF sina Avanceña at ang anak nila ni Duterte na si Kitty. Ayon sa tagapagsalita ng PNP na si Brigadier General Jean Fajardo, pinatatabi nila ang mag-ina para hindi maharangan ang pagdadala kay Duterte sa eroplano.
Dahil napahiwalay si Kitty sa tabi ng ina, at napagitnaan sila ng mga pulis, maririnig na sumisigaw si Avanceña: “Ibalik ‘nyo ang anak ko!” Sa tangkang mapatabi ang mga nakaharang na pulis, malakas na pinukpok ni Avanceña ng cellphone ang isa sa mga ito.
Maaaring dito napunit ang pantaas ni Kitty na ipinakita niya sa isang post sa Instagram.
Nagkabukol at namaga ang ulo ng babaeng pulis na nilandingan ng cellphone. Ayon kay Fajardo, magsasampa ng reklamong direct assault ang biktima, na suportado ng PNP.
Matapos ang kaguluhan, ayon kay Interior Secretary Jonvic Remulla, inalok ng pamahalaan si Avanceña na sumama sa eroplano ni Duterte, ngunit tumanggi ito.
Kasama ni Duterte na lumipad pa-Netherlands sina dating executive secretary Salvador Medialdea, isang nurse, at isang assistant. Sa bahagi ng gobyerno, sumama sa eroplano ang isang representante ng Philippine Center for Transnational Crime, isa pang doktor, at tatlong police officers: isang major, isang lieutenant colonel, at isang captain.
Sundan ang blow-by-blow updates ng Rappler sa pag-aresto kay Duterte hanggang pagtanggap sa kanya sa ICC Detention Center sa Scheveningen. – rappler.com
