Nais ni Pangulong Ferdinand ”Bongbong” Marcos Jr., ng isang holistic at komprehensibong diskarte pagdating sa paglutas ng mga problema sa trapiko sa bansa, ayon kay National Economic Development Authority (NEDA) Secretary Arsenio Balisacan noong Huwebes.
Sa isang press briefing ng Palasyo, sinabi ni Balisacan na masinsinang tinalakay ang mga isyu sa trapiko sa ika-16 na full Cabinet meeting kay Marcos noong Miyerkules.
“Ang gusto talaga ng Pangulo ay isang comprehensive, holistic approach to solving the traffic problem – hindi iyong piecemeal approach ‘no as has been the case all these years ‘no,’ sabi ni Balisacan.
“Napakahaba ng talakayan natin sa isyu ng trapiko at binigyan ng tagubilin ng Pangulo ang lahat na magsumite ng kanilang mga rekomendasyon, kung paano mag-a-adjust at mag-configure ang kani-kanilang opisina sa kanilang work environment,” aniya.
Sinabi ni Balisacan na sa pagpaplano ng sistema ng transportasyon ng Pilipinas, ”dapat tingnan natin ang intermodal transport system.”
” Sila ay nagpapatakbo nang mahusay sa kabuuan. Ginagawa natin ngayon ang subway, gumagawa tayo ng ibang expressway, mga tulay na nagdudugtong sa Bataan at Cavite at iba pa,” paliwanag ng NEDA chief.
“Ngunit ang mga ito ay dapat makita sa konteksto ng lahat ng iba pang sistema ng transportasyon kabilang ang bike lane, motorcycle lane tulad niyan at pati na rin ang feeder roads at kasama ang lokasyon ng mga industriya, tirahan at iba pa,” dagdag ni Balisacan. —VAL, GMA Integrated News
