Ito ang buod na binuo ng AI, na maaaring may mga error. Para sa konteksto, palaging sumangguni sa buong artikulo.
Kakatawanin ni CJ ang Pilipinas sa Miss Grand International pageant ngayong Oktubre sa Bangkok
MANILA, Philippines – Tinanghal na Miss Grand Philippines 2024 si CJ Opiaza ng Castillejos, Zambales sa ginanap na live coronation night sa Newport World Resorts sa Pasay noong Linggo, Setyembre 29.
Tinalo ni Opiaza ang 19 na iba pang kandidato sa kompetisyon para pumalit kay Miss Grand Philippines 2023 Nikki de Moura.
Sa coronation night, ilang special awards din ang naiuwi ni Opiaza, kabilang ang Best in Swimsuit, Miss Photogenic, at Miss Multimedia.
Bago sumali sa Miss Grand Philippines 2024 pageant, naunang sumabak si Opiaza sa Binibining Pilipinas 2022 at Miss Universe Philippines 2023, kung saan nagtapos siya ng 1st runner-up kay Michelle Dee ng Makati.
Bukod kay Opiaza, si Sophia Bianca Santos ng Pampanga ay idineklarang Universal Woman Philippines 2025 habang si Anna Margaret Mercado ng Quirino ay tinanghal na Miss Teen International Philippines 2024.
Samantala, si Jubilee Therese Acosta ng Maynila at Alexandra Mae Rosales ng Laguna ay nagtapos ng 1st runner-up at 2nd runner-up, ayon sa pagkakasunod.
Si Opiaza, 26, ang pangalawang beauty queen na kumatawan sa Pilipinas sa Miss Grand International sa ilalim ng ALV Pageant Circle. Ang prangkisa ay dating nasa ilalim ng Binibining Pilipinas Charities (BBPCI) hanggang sa mag-withdraw ang BBPCI noong Nobyembre 2022.
Si Opiaza ang magiging kinatawan ng Pilipinas sa Miss Grand International pageant na magaganap sa Oktubre sa Bangkok, Thailand.
Mula nang magsimula ang Miss Grand International noong 2013, walang Filipina beauty queen ang nakapag-uwi ng gintong korona. Ang pinakamataas na puwesto ng Pilipinas sa pageant ay ang 1st runner-up winners na sina Nicole Cordoves (2016) at Samantha Bernardo (2021). – Rappler.com
