Tuloy-tuloy ang tagumpay ng “Hello, Love, Again”!
Ayon sa ulat ni Patricia Tumulak sa “24 Oras” nitong Lunes, ang pinagbibidahan nina Alden Richards at Kathryn Bernardo ay umabot na sa P520 milyon sa mga sinehan sa Pilipinas simula noong Nobyembre 18.
Sinabi rin sa ulat na isang bahagi ng kita ng pelikula ay mapupunta sa mga biktima ng bagyo.
Nauna rito, sinabi ng ulat ng Deadline na ang sequel ng “Hello, Love, Goodbye” ay nakakuha ng $2.4 milyon sa 248 na site sa United States sa pagbubukas ng linggo nito.
Ang “Hello, Love, Again” ay nakapasok din sa kasalukuyang Top 10 na pelikula sa US, na nasa ikawalo. Ito ang kauna-unahang pagkakataon na isang pelikulang Pilipino ang nakapasok sa listahan.
Ang “Hello, Love, Again,” sa direksyon ni Cathy Garcia-Sampana, ay nagpatuloy sa kuwento nina Joy at Ethan limang taon pagkatapos ng mga kaganapan sa 2019 blockbuster na “Hello, Love, Goodbye.”
Kasama rin sa pelikulang pinagtutulungan ng Star Cinema at GMA Pictures sina Joross Gamboa, Valerie Concepcion, Jennica Garcia, Kevin Kreider, at marami pa.
—Jade Veronique Yap, GMA Integrated News
