LEGAZPI CITY — Anim na katao ang namatay sa leptospirosis sa Bicol mula Enero 1 hanggang Agosto 10 ngayong taon, ayon sa ulat ng Department of Health (DOH) noong Huwebes, Agosto 22.
Sa buong rehiyon at sa loob ng nasabing panahon, nakapagtala ang DOH ng 65 kaso ng leptospirosis, isang sakit na dulot ng Leptospira virus mula sa ihi ng mga infected na hayop na maaaring makahawa sa tubig at lupa.
Dalawa sa mga nasawi ay naitala sa lalawigan ng Masbate, habang tig-iisang pagkamatay ay naitala sa mga lalawigan ng Albay, Camarines Sur, Camarines Norte, at Catanduanes.
Karamihan sa mga kaso ay sa Camarines Sur, kung saan 25 kaso ang naitala mula noong simula ng taon. Ang 13 kaso ay sa Camarines Norte, 10 sa Albay, pito sa Masbate, anim sa Sorsogon, at tatlo sa Catanduanes.
Sa unang kalahati ng 2023, ang rehiyon ng Bicol ay nagkaroon ng 160 kaso ng leptospirosis.
Pinaalalahanan ng DOH ang publiko na iwasang lumubog sa kontaminadong tubig o tubig baha at gumamit ng bota at guwantes kapag hindi ito maiiwasan.
Pinayuhan din ng ahensya ang publiko na uminom lamang ng malinis na tubig, tiyakin ang tamang pagtatapon ng basura, panatilihin ang malinis na paligid, at maghugas ng malinis na tubig kapag nalantad sa posibleng kontaminadong tubig o tubig baha.
