TACLOBAN CITY – Lima katao ang nasawi habang dalawa pa ang sugatan matapos mabangga ng isang loader truck ang kanilang mga bahay sa Barangay Caglanipao Sur, Tinambacan District sa Calbayog City, Samar noong Martes, Hulyo 2.
Hindi pa inilalabas ng Calbayog City police ang mga pangalan ng mga biktima.
Ayon sa ulat ng pulisya sa lungsod, ang trak na minamaneho ng isang 40-anyos na lalaki mula sa Caloocan City ay bumibiyahe mula Naval sa Biliran patungo sa bayan ng Allen sa Northern Samar nang mag-malfunction ang preno ng trak na naging sanhi ng pagtabingi ng sasakyan sa gilid ng kalsada. at tinamaan ang mga bahay ng mga biktima na natutulog.
Hiwalay na dinala ang mga biktima sa Calbayog District Hospital at St. Camillus Hospital kung saan lima sa kanila ang idineklara na dead on arrival ng mga attending physician.
Nasa pitong bahay ang nasira dahil sa insidente.
Ang driver ng trak ay inaresto sa ospital at sinampahan ng kasong reckless imprudence resulting in multiple homicides, serious physical injuries, at damage to properties.
