LUCENA CITY – Arestado ang apat na hinihinalang drug traffickers sa magkahiwalay na anti-narcotics operations sa Quezon province noong Lunes at Martes, kung saan nasabat ng mga awtoridad ang mahigit P877,000 halaga ng hinihinalang shabu (crystal meth) at tatlong hindi lisensyadong baril.
Sa ulat noong Martes, sinabi ng Police Regional Office 4A (PRO-4A) na inaresto ng mga operatiba nito ang dalawang suspek na kinilala lamang sa kanilang mga alyas na “Sandie” at “Tikboy” bandang alas-3:27 ng umaga nitong Martes sa Barangay Manggalang Bantilan sa bayan ng Sariaya matapos umanong magbenta ng 10 gramo ng hinihinalang shabu sa isang undercover na pulis sa isinagawang buy-bust operation.
Narekober mula sa mga suspek ang tatlong heat-sealed plastic sachet at isang knot-tied plastic sachet na naglalaman ng kabuuang 120 gramo ng hinihinalang shabu na tinatayang nasa street value na P816,000, batay sa standard valuation ng Dangerous Drugs Board.
BASAHIN: 2 drug suspect, arestado sa Quezon; P2.1-milyong shabu ang nasabat
Nakumpiska rin ng mga pulis ang isang motorsiklo na walang plate number na pinaniniwalaang ginamit sa umano’y ilegal na gawain ng mga suspek, gayundin ang isang mobile phone na susuriin ng mga imbestigador para sa posibleng ebidensya ng transaksyon ng droga.
Kinilala ng pulisya ang dalawang suspek bilang high-value individuals (HVIs) sa kalakalan ng iligal na droga, isang klasipikasyon na binibilang ang mga umano’y drug trafficker, financier, at miyembro ng mga sindikato ng droga.
Sa hiwalay na operasyon, naaresto ng mga pulis na nagsilbi ng search warrant ang suspek na kinilalang si alyas “Jessie” sa Barangay Angeles Zone IV, Tayabas City, nitong Lunes ng umaga.
Narekober ng mga awtoridad ang tatlong sachet na naglalaman ng hinihinalang shabu na nagkakahalaga ng P40,800, isang unlicensed caliber .45 pistol, dalawang magazine, 15 basyo ng bala, at isang caliber .38 revolver na kargado ng 10 rounds.
Nitong Lunes din, nagsilbi ang pulisya ng panibagong search warrant laban sa suspek na kinilalang si alyas “Carlos” sa Barangay Bulakin I, Dolores, bandang alas-9 ng umaga.
Nakuha mula sa suspek ang dalawang sachet ng hinihinalang shabu na tinatayang nasa P20,672 ang halaga at isang hindi lisensyadong kalibre .45 pistol na may kargang pitong basyo ng bala. Kinilala ng pulisya si Carlos bilang isang street-level drug personality sa kanilang watch list.
Mahaharap ang apat na suspek sa kasong paglabag sa Comprehensive Dangerous Drugs Act of 2002. Kakasuhan din sina Jessie at Carlos ng illegal possession of firearms./coa
